Podería ter o corpo de león e acaso de anguía a cabeza e o torso.Si, así sería o Griffón. Un monstro semellante a unha
historia: delgado, escorredizo, traizoeiro e doutro mundo como a anguía, pero sólido, poderoso, imponente e terrestre coma
o león. O problema -angustioso problema para o cansado profesor de literatura que deixou Galicia por Aix-en-Provence- é cómo
facer que o monstro se apareza, qué palabras son as que poden convocalo tan lonxe do seu ambiente, qué historia pode, ao
contarse, renovar os soños murchados do noso século XX.
Ah, pero o Profesor Visitante ten a reposta moito máis preto do que se pensa; e tamén máis lonxe, porque calquera historia
é un estraño grifo, un animal composto que une realidade e lenda, anguía e león, pasado e presente. ¿E, qué saberá o Profesor
Visitante da azarosa vida daquel Visitador do Santo Oficio que viviu en tempos de Felipe II? Por iso unha historia é coma un
tremor cósmico, un oscuro burato no tempo que pode divertirse facendo que Visitador e Visitante vivan e viaxen ignorándose
-separados por séculos de distancia- pero tamén, cruzándose perigosamente.